حصريا وبأنفراد من هارى بوتر على كلمه اجرأ طرق التعارف على المنتديااااااات

الاسم بالكامل :

احمد

السن :

21 سنة

بتحب تأكل ايه :

يعنى .. مكرونة بشاميل .. المحشى بأنواعه ورق عنب وغيره .. وحاجات كتير بحبها بس دول اكتر حاجة

بتحب تشرب ايه :

انا ماليش فى اى حاجة من المشروبات السخنه خالص ولا بحبها
بس بحب اشرب كابتشينو سبرانو اسبريسو .. بس دا كل فين وفين طبعا
ولكن الحاجة الساقعة دا اكيد وخصوصا الماونتن ديو و السفن اب والبيبسى

بتحب النت ؟ :

اكيد وانك تعاصر عصرك وتعرف ايه بيدور حوليك وانت فى مكانك
بس لقيت بجد ان فى حاجات كتير فى الدنيا احلى بكتيير تستاهل الوقت اللى بنضيعه ادامه

بتحب منتدى كلمه ؟ :

طبعا لان دا حاجة تحس انها بتاعتك انت وبتطلع فيها اللى جواك وبتطورك من مجرد مشاهد لمشارك لمفكر لمبتكر و بقيت انك مش بس بتشوف غيرك بيعمل ايه لاء انت اللى بتفكر وتعمل وتخلى غيرك يشوف الى بتعمله انت

مين العضو و العضوه الى بتحبه أكتر ؟ :
مين العضو و العضوه الى بتحترمه اكتر ؟:
مين الشخصيه المهمه من المنتدى الى بتعزها ؟ :
مين من الاعضاء او المشرفين الى عاوز تهديله أغنيه انته بتحبها ؟:
مين العضو الو العضوه او المشرف او المشرفه الى انته مش مرتحله فى المنتدى ؟:

لو فضلت اقلك اسم اسم بكده هقلك اسماء الاعضاء كلها لاننا كلنا اخوه واصدقاء واسرة واحدة
واكيد هما هيكونوا اكتر حد احبه واحترمه واعزه ومرتحاله واهديهم ماهو اغلى من مجرد اغنية وهو حبى و ودى



وكفايه عليك كده لانى بصراحه مش عارف أقول ازيد من كده علشان انته متزعلش

يا جميل انت تقول كل اللى يخطر فى بالك واسأل تانى وتالت و ربنا مش هيجيب زعل ان شاء الله
واحب اشكرك على اسئلتك الجميلة اللى كتير استمتعت وانا برد عليها وطلعت حاجات كتير جوايا
يمكن مش قلت كل اللى جوايا بس اللى قلته كان كله من جواي

حبيبى ....... مالك كده داخل حامى

لا حامى ولا حاجة يعم انا برد على اد السؤال مش اكتر

ومادام مفيش وراك حاجة جاوب يا معلم

ومالوا يا ريس قول اللى ف نفسك

1- أنت قولت أنك محبتش قبل كده أمل أيميلك ليه مش عليه الا 3 رجاله والباقى حريم ؟ و موبايلك بيفضل يرن طول الليل وبيصحينى من النوم ومتقوليش ان ده واحد صحبك استحالة ان ذكر يرن عليك بالليل ؟

انا فعلا قلت انى محبتش قبل كده و كنت بقول الحقيقة و برده كلامك اللى بتقوله دا صحيح بس برده مش ينفى اللى انا قولته دى حاجة ودى حاجة لان مش شرط ومش معنى يعنى انى دا عشان يحصل وان ايميلى يكون عليه بنات اعرفها وبكلمها او ان موبايلى زى ما بتقول مش بيبطل رن وبيكون برده معظمها من بنات مش شباب انى اكون حبيت قبل كدا بالعكس كلهم علاقتى بيهم صداقة او زمالة قديمة فى الكلية مش اكتر يعنى

2- ايه وجهة نظرك فى العلاقة بين البنت والوالد ؟وهل فعلا فيه صداقة بين واحد وواحدة ؟ وهل العلاقات دى بتنجح ؟

خلينا نتكلم حاجة حاجة
العلاقة بين الولد والبنت ودا لو قصدك يعنى علاقة حب وارتباط فطبعا دى حاجة جميلة جدا بس لما تكمل كل اركانها اللى تخليها تكمل واكيد اؤيدها امال الناس هتتجوز ازاى اه معاك ان فيه جواز صالونات وناجح لانه بعد كده بيتولد حب عشره بس تخيل ان الحد اللى كان بينك وبينه قصة حب وكملت وبقيت انت وهو فى بيت واحد وتخيل كمية السعادة اللى هتكونوا فيها واللى هتكون اكبر بكتير من جواز الصالونات بس هى المشكلة ان مش كل علاقة حب بتكمل للاخر لان مفيش اساس من البداية وفيه تسرع من كلا الطرفين لمجرد ان يعيش التجربة وخلاص لكن اذا الطرفين اختاروا بعض ليكملوا للاخر بجد هيبقى احلى بكتير اوى من جواز ناخد فلان لفلانه
اما لو كنت بتتكلم عن علاقة الولد بالبنت علاقة صداقة ف ايه يمنع طالما هو حد محترم وهى كمان وبيحترموا بعض وبيحترموا علاقة الصداقة اللى بينهم ونجاحها بيكون على حسب الاشخاص

3- ايه أكثر 5 أيام أثرت فى حياتك ؟ ومشاعرك فى كل يوم على حدا وخد راحتك على الاخر ؟

فى ايام مش بس اثرت فى حياتى بالسلب او الايجاب دى غيرتها تماما
- اكتر يوم كان يوم وفاة والدى الله يرحمه ان شاء الله وطبعا مقدرش اوصفلك مشاعرى كانت ايه فى اليوم دا بس الاكيد انها اثرت فيا اوى بالسلب
- يوم تكريمى فى 3 اعدادى امام الجميع من اساتذه كرام هى لم تكن الاولى بس كانت مختلفة جدا عن اللى قبلها واللى كانوا اامام زمايلى لكن دى كانت امام اهلى وامام الكل ويوم مش انساه وهدايا لا زلت احتفظ بها ومشاعرى فيه كانت كلها فرحه

لو فضلت احكليلك هيطلعوا اكتر من 5 ايام بس كده كفاية لانك قلبت عليا حاجات كتير

4- أذكر 5 شخصيات أثرت فى شخصيتك ؟ و أثرت فيك أزاى ؟ وهل مزاياهم مختلفة عن بعض ؟ ولو مزاياهم مختلفه أذكر ميزة كل واحد فيهم ؟ وازاى استفدت منها فى حياتك مع ذكر مواقف ؟ وبقولك خد راحتك اصلها عندنا من زمان .

شخصية قدوتنا ومعلمنا سيدنا محمد صلى الله عليه وسلم وطبعا محدش فينا عاصره لكن السيرة النبوية العطره هى خير زاد لنا
شخصية والدى الله يرحمه ان شاء الله واللى كان ليا اول كتاب فهمنى ايه هى الحياة بمواقفها وازاى اتصرف فى كل موقف
افتكر هما اكتر شخصيات بالنسبالى
بس فى مواقف كتير حصلتلى فى حياتى اتعلمت منها كتير وكانت من شخصيات مختلفة وعابرة فى حياتى مقدرش اقول انها اثرت فى شخصيتى لكن الموقف نفسه وغيره من المواقف هى اللى قامت بالدور دا


5- أذكر الاعضاء دى بتمثل ليك ايه فى المنتدى ( telenet - عبده حرنكش - mando - harry potter - سنيوريتا - نسمة المنتدى - msshams - sfwa_sat - nogom net - ومسافر بلا عنوان ) الاراء تكون بصراحة

هقول حاجة واحدة كلهم مشتركين فيها وهى انهم عزاز اوى على قلبى

مش عايز أتقل عليك لانك حبيبى من أيام الجيزة ونخليها خمسات خمسات وبالنسبة للأجابة يكفى ان الله شاهد عليك ان كنت بتلف ولا دى الصراحة يا معلم ولنا لقاء

لا يا باشا ولا تقلت ولا حاجة خد راحتك وربنا يعلم انى بتكلم من قلبى