دروس فى الرزاله اتعلموا وادعولى

[ندعوك للتسجيل في المنتدى أو التعريف بنفسك لمعاينة هذا الرابط]

[ندعوك للتسجيل في المنتدى أو التعريف بنفسك لمعاينة هذه الصورة]

الحصة الاولى

ازاى تبقى رذل فى المواصلات

لو راكب فى باص أو ميكروباص وجنبك حد نايم اوعى تسيبه نايم
كل شوية اقعد قول وصلنا عشان يصحى مخضوض لو عمل اهبل صحيه وقوله مش انت نازل هنا بيتهيألى
لو مش نايم متسيبوش فى حاله برضه عيب عليك متجيش

ركز على سؤال واقعد اسألهوله كل شوية زى أنت نازل فين طب انت دفعت ولا لأ
لو قاعد هو جنب الشباك جوه وقالك عدينى قوله رجلى منملة مش قادر وخليه ينط زى القرد
أو قوله ماتنزل من الشباك

لو انت فى أتوبيس وقاعد على كرسى وجنبك ناس واقفة استمتع بقى وخدك وقتك
اتمطع بقى وقول ياسلام على الراحة الواحد مكنش عارف هيعمل أيه لو مش قاعد
لو العكس بقى اقعد اسأل كل واحد انت نازل فين واقعد قول بصوت عالى
ياجماعة محدش نازل قريب أصل انا عايز اقعد طول مانت واقف قول كده لحد مايقعدوك
لما الكمسرى يجى ياخد منك الاجرة اسأله على تمن كذا مكان

يعنى قوله هو لغاية الحتة الفلانية بكام طب لغاية الحتة دى بكام
اسأل على تمن كل الاماكن اللى تعرفها لحد مايقولك ياعم خلصنى رايح فين
قوله مانا عشان ابقى عارف بس وتقل فى العيار يمكن يسيبك ويمشى
لما يدى حد تذكرة قوله ورينى كده لو سمحت واقعد اتأمل فيها
لحد ما صاحبها يزهق ويشدها منك

فى مفتش بقى ساعات بيطلع يفتش على التذاكر وبيطلع على السريع كده وينزل
أنت بقى اوعى تديهاله علطول كده أزعل منك والله

دور عليها ساعة حط ايدك فى جيوبك مية مرة هيقولك خلص يا استاذ قوله ثوانى كانت معايا والله
واقلع الجذمة ودور فيها وفى الاخر طلعها من بوقك بعد مايكون هو مات من الملل وقوله مش قولتلك
كفاية كده بقى حرام المفروض تنزل قبل الناس ماتموت منك
أستنى رايح فين أنت نازل عادى كده ولا كأنك رذل ولا حاجة
وأنت نازل هيبقى فى ناس واقفة أعمل نفسك مش عارف تعدى

وحاول تجاهد على قد ماتقدر وتضيع الوقت اللى تقدر عليه
لحد الناس ماتشيلك وترميك بعد ماتكون جبتلهم السكر ورفعت ضغطتهم

i كده إنتهت الحصة الأولى
واللى عنده أى إضافة مفيش مانع
أهو معلومة ونستفيد منها كلنا
درس خصوصى مجانى أهو للى عايز يتعلم

[ندعوك للتسجيل في المنتدى أو التعريف بنفسك لمعاينة هذه الصورة]

الحصة التانية
ازاى تبقى رذل فى الكلية

فى الكلية هتقابل صاحبك وهتقعدوا على أى كافيه بقى
هيجى الجارصون سيب صحبك يطلب الأول وبعدين استلم الجارصون بقى واديله نصيبه
قوله عندك برجر ؟ هيقولك اه
قوله حلو ؟ هيقولك تمام
قوله اوك يبقى اكتب واحد شاورمة
طب عندك كبده ؟ هيقولك ايوة قوله معمولة ازاى ؟
سيبه يرغى شوية وقوله انا اصلا مبحبش الكبدة فكك
حاول تطلب حاجات غريبة زى سندوتشات حلاوة طحينية على اساس انك فى سجن أبو زعبل
أو سندوتشات بيض أو بتنجان أو لبن العصفور أمسك فى الحاجات اللى مش موجودة كلها
المهم حاول تجيبله جفاف عقبال ماتطلب اللى انت عايزه
وأنت بتاكل بقى أتسلى على المخلل اللى مش عاجبك أرمى شوية على التربيزة وشوية على الأرض أنت وذوقك بقى
لو معاك كاتشب مفيش مانع تكتب أول حرف من اسمك على التربيزة المهم تخليله التربيزة شبه التورتة
ومتنساش تعيب على الأكل وأنت بتحاسب وكمان تقول الحساب غالى
فى المدرج أرشق نفسك بين أتنين متعرفهمش وابتدى الشغل بقى أتعامل على إنك صاحبهم من قرن
يضحكوا على حاجة اضحك معاهم كده يعنى المهم تركز معاهم كأنك من بقيت أهلهم ولا خلفوك ونسوك
أو طريقة تانية أتلكك لكل اللى جنبك كل ماحد ينطق كلمة قوله لو سمحت أسكت عشان أفهم
لو مسكتش أنا هقول للدكتور والحركة دى رذلة ومستفزة جدا بس اشطه يعنى
وياسلام لو واحد وواحدة يبقى أنت كده جبت من الآخر
لو جنبك واحد بيكتب يبقى اتفتحتلك طاقة القدر اقعد اسأله وعطله ومتخليهوش يكتب سطرين على بعض
استلم أى حد واسأله المحاضرة هتخلص امتى ؟ وكل فيمتو ثانية كده اسأله الساعة كام اصل أنا زهقت
طبعا هو اللى زهق وطهق من الكلية وبيقول ياريتنى ماكملت تعليم وكره حياته كلها زى باقى الضحايا
عايز تعمل دماغ حلوة روح على شباك شئون الطلبة المهم حاول تعمل أهبل وأنت داخل وعايز تقف أول واحد
هيرجعوك ورا تحاول تقف مكان أى حد وترذل على كله هما أصلا بيبقوا واقفين مش طايقين نفسهم
لو واقف تانى واحد كده مفيش مانع تزق اللى قدامك تلبسه فى الشباك الحديد وتقول الله ياجماعة ياللى ورا متزقوش
ومن قبل ماينطق ولا كلمة تقعد تقوله خلص يالا عشان غيرك ومتخليهوش يركز مع بتاع شئون الطلبة خالص
لما يجى دورك بقى بيبقوا عايزين يخلصوك ويكروتوك واللى واقفين وراك فى الطابور مستنينك تغور فى داهية بفارغ الصبر
خد وقتك كأنك بتحجز فى سينما و اسأل أسئلة كتير وكل مايقولك حاجة قوله مش فاهم معلش قول تانى فهمنى أعمل أيه بالظبط لحد ماتشل أكبر عدد ممكن
وبكده يبقى أنت مارست هوايتك وقضيت يوم رذل
iالحصة الجاية إن شاء الله على الموبايل
هكشف كل أسلحته الفتاكة
بس عايز أعرف الأول أيه رأيكوا فى الحصة التانية؟؟؟

[ندعوك للتسجيل في المنتدى أو التعريف بنفسك لمعاينة هذه الصورة]

الحصة التالتة
. الموبايل

بص ياسيدى أنت دلوقتى ماسك موبايلك وبتلعب فيه وبتسأل أى واحد جنبك أو حد متعرف عليه جديد رقمك كام ؟
سيبه يمليك نص الرقم كده وروح مشغل أى نغمة هو فاكرك بتسجل الرقم أتاريك بتلعب فى النغمات وهو بيملى عالفاضى
بتاخد الرقم من حد مش معاك رقمه وتقوله قولى رقمك وأنا هحفظه عشان الموبايل فاصل شحن
وشغل الغباء بقى كل مايقولهولك قوله غلط ومرة كده قولها صح يقولك تمام كده قوله اشطه يعنى هو كذا كذا وقوله غلط
هيقولك يابنى حرام عليك بقى قوله معلش معلش عشان احفظه بس وسوق الاستهبال لحد ماتحرق دمه

بتاخد الرقم من حد برضه قوله رن عليا عشان أسجل رقمك أنا حاطط الموبايل فى جيبى بس عامله صامت
ومليهوله غلط بقى هيرن عليك هيلاقى اللى بيفتح عليه ويقوله آلو وقوله معلش معلش مليتهولك غلط قال يعنى حد بيتلخبط فى رقمه
طريقة أضمن بقى قعد أخوك الصغير بموبايلك وقوله أنا خارج وأول ماتسمع صوت الموبايل أتكى على الزرار ده
الزرار الأخضر ده ؟ أيوة ياحبيبى الزرار ألأخضر ده وأقول آلو ؟ برافو عليك تعجبنى نصاحتك قول اللى أنت عايزه
وأطلع بقى يامعلم خد نمر ناس على قد ماتقدر أخوك يرد وأنت تقوله آآآخ نسيت الموبايل فى البيت وخليه يشيل بقى
كل ماتتفق مع حد على ميعاد قوله أبقى رن عليا قبلها بنص ساعة عشان لو نسيت بس وأستناه فى الموعد المرتقب
وأول ماتلمح اسمه رد علطول هيقولك بتفتح ليه ؟ قوله فاكرك بتتصل عشان غيرت الميعاد أو مش جاى قولت أطمن
بقى بذمتك قولت أطمن ولا قولت أرذل ماشى ماشى ماعلينا

قول لصحبك هات الموبايل بتاعك هعمل منه دقيقة هيقولك والله ممعيش غيرها برن بيها قوله ياعم دى مسألة حياه أو موت
وخد الموبايل بقى أتصل بمامتك أيوة ياماما عاملة أيه ياحبيبتى ؟ أنتى عاملة أيه على الغدا النهارده ؟
محشى الله بموت فيه طب وأيه تانى ياماما ياماما ياماما عفوا لقد نفذ رصيدكم
لو صحبك معاه كريديت كتير بقى أبقى خلى مامتك تحكيلك عملت المحشى ازاى
صحبك بيتصل بس اتأكد انه بيتصل عشان حاجة مهمة عشان ميقفلش السكة فى وشك وكل شوية قوله خليك معايا كده
أنت رجعت من الشغل يا بابا ؟ طب ماهو من ساعة مانت اتولدت وهو بيرجع من الشغل فى الوقت ده أيه الجديد
أرجع لصحبك بقى أيوة معاك طب أستنى أستنى أيه الصوت ده ياماما أنتى فى المطبخ ؟ ماهى طول عمرها بتحضر الغدا فى الوقت ده
طبعا الله يكون فى عون صاحبك اللى مش عارف ياخد منك كلمتين على بعض
قول لصحبك حلوة أوى الرسالة دى هنقلها بس طويلة أوى طبعا كلنا فاهمين أنت بتلمح لأيه يارذل
(هو عشان يطلع ذوق معاك هيقولك خلاص ياسيدى أبعت اللى عاجباك دى (واحدة بس
طبعا فهمتوا قصدى من اللى بين القوسين أبعت بقى الرسايل كلها حتى لو فيها كلمنى شكرا
وقوله بصراحة كله عجبنى بس ياخسارة الرصيد خلص كان ناقص واحدة نفسى أخدها
أستلم رقم ابعتله كل يوم التلاتة بتوع كلمنى شكرا ورن عليه كل فيمتو ثانية مرة يتصل بيك أفتح ومتتكلمش ولا كلمة
آلو آلو آلو رد ياحيوان وأنت باصص فى السما وعامل أهبل خليك كده بقى لحد مايغير الخط أو يبطل يشيل موبايلات
بتبقى اسمها بالعربى ملاحظات ده فى نوكيا(notes)معاك موبايل فيه بلوتوث وقاعد فى مدرج الكلية أو سينما وكده أفتح الـ
أكتب فيها - فكك منى - وأبعتها لكل اللى فاتحين طبعا أى حد هيستلمها هيقول أيه الرذل ده أنا يعنى كنت طلبت من خلقته حاجة
قول لصحبك معرفش يا أخى الموبايل بتاعى ماله هيقولك أيه يعنى فيه أيه ؟ قوله رن عليا كده هيرن عليك
أتكى على أى زرار فى الموبايل هيقوم فاتح عليه قوله شوفت بتكى على أى زرار يقوم الموبايل فاتح على اللى بيرن زيك كده
(any key answer) طبعا أنت مشغل خدمة
اللى هى خدمة أى زرار يرد على اللى بيتصل بيك وخليته يشيل المكالمة
قول لصحبك حولى جنيه رصيد عشان أرن بيه بدل مانا مفلس يعنى يرضيك كده ولا هتستخسر فيا جنيه
هيقولك لا مش هستخسر بس ازاى ؟ قوله تمام قولتلى ازاى تحولى ستة جنيه ولما يوصلوا أحولك أنا خمسة جنيه
هيقولك ماشى حول بقى يامعلم ولما تيجى تردهمله هيقولك مينفعش تحول رصيد وأنت رصيدك أقل من سبعة جنيه
وخليه يشيل الستة جنيه بحالهم والطريقة دى هدية منى ليكم

أنا قولت أعملكم الحصة قبل مانزل الكلية عشان حسيت إنى اتأخرت عليكوا

[ندعوك للتسجيل في المنتدى أو التعريف بنفسك لمعاينة هذه الصورة]

الحصة الرابعة
ازاى تبقى
رذل مع صحبك

لو خارج مع صحبك مشوار
أو بتروحوا حتة معينة كلية أو مدرسة أو أى حاجة
أتصل بيه قوله إوعى تنزل
غير لما أفوت عليك وطبعا هو مش هيشوف وشك
يرن عليك نفض يتصل بيك نفض
سيبه لحد مايطق وينزل لوحده
طبعا أنت عارف الأوقات اللى بينام فيها ولو
من النوع اللى بينام بعد الكلية كلمه على تليفون البيت
وقول للى يرد
عليك يصحوه ضرورى وهما احتمال كبير مش هيكونوا سايبلنه عدة تليفون فى أوضته
عشان
طبعا ميقعدش يحب بيه طول الليل فا هيضطر يمشى لحد الصالة أقعد أرغى معاه
ورذل عليه
واحد هيقولى طب أرذل عليه ازاى طب خلاص متزعلش أعلمك يعنى
مثلا تقوله خبر يزعله جدا
حاجة حلوة تصدمة كده وتخليه بدل ماكان عايز
ينام عينيه هتطلع من مكانها وفى الاخر قوله بهزر
المهم أفضل أستفزه لحد
ماتطير النوم من عينه
لو صحبك بيتكلم فى التليفون حاطط السماعة على ودن
وأستلم أنت بقى الودن التانية الفاضية
خليه يحس إنه واقف فى مولد مش
عارف الكلام جى منين بالظبط
دبس صحبك فى كل حاجة مثلا فى مواصلات أو فى
كافيه أو فى سينما
أدخل سنترال إتكلم وقوله معاك فكة أصل معييش غير مجمد
قال يعنى معاك ورقة بمليون جنيه
أو قوله نسيت المحفظة فى البيت أو
الفلوس ضاعت ولا إتسرقت أو متخانق مع باباك ومدكش فلوس
خليه مش فاضل غير
بعد كده ياخد مصروف ليه وليك
لو صحبك رايح أى مشوار هيقابل حبيبته مثلا
وقالك لو حد من بيتنا أتصل بيك قوله إحنا بنذاكر
وأول ما حد يتصل قولهم
لا والله هو تحت مش عندى وقوله يعنى أنت عايزنى أكدب
قال يعنى الإيمان
مقطع بعضه وصادق فى كله جت على دى
لو لسه مخلصين إمتحانات الشهر فى
المدرسة أو إمتحانات الميد تيرم فى الكلية ودرجات صحبك وحشة
قوله أنا
لازم أجى أذاكر معاك النهارده وطبعا هتشوف باباه ولا مامته وهيسألوك عن
المذاكرة وكده
قولها والله إحنا بنذاكر بس مش عارف هو جاب درجات وحشة
وسيحله بقى خليهم يستلموه
ويكبسوا على نفسه طول السنة
ياسلام لو
اتأخرتوا 5 دقايق كده عن المحاضرة والدكتور قال مش مدخل حد بعدى وطردكوا
يبقى
لازم تروح بيته وتشتكى لباباه ومامته وتعمل برئ ومظلوم دانتوا يادوب
اتأخرتوا خمس قايق بس
هتخليهم يخلوه يروح يفتح الكلية بنفسه من الساعة
ستة الصبح عشان ميتأخرش عن المحاضرة
خارج أنت من البيت بقى وبتستأذن
باباه أو مامته بيقولوك ماتخليك ياحبيبى تتغدى معانا قولهم شكرا
صحيح
يابنى أنت عملت شيت مادة كذا وطبعا أنت متأكد إنه لا عمله ولا جه ناحيته
الباشا
بقى فى نص هدومه وهيرد باباه ولا مامته لا طبعا ويعمل ليه هو فاضى للحاجات
دى
والأهل مش بيتفاهموا فى حكاية الدراسة دى بالذات يعنى أقلبها نكد
على صحبك قبل ماتمشى
خد موبايل صحبك من غير مايحس وخبيه وخليه يفتكر إن
الموبايل ضاع ولا إتسرق لحد مايجيب آخره
لو هو مفتح شوية وواخد باله
يبقى على نفسه برضه قوله ورينى الموبايل بتاعك كده وفى وسط القعدة
استأذن
مثلا هتجيب حاجة ولا هتعمل حاجة وخده وروح وخليه يدوخ عليك فى المكان
ويتصل بيك مليون مرة
لحد مايجى ياخده منك من البيت وياسلام لو مفاتيح
عربيته يبقى يجى بتاكسى ويرجع بتاكسى بعدين يبقى يروح بعربيته
امال هو
يعنى يركب عربية وسواقين التاكسى ياكلوا عيش منين
لو شوفته واقف مع
واحدة طب عليه زى القضى المستعجل وخده بالحضن ودخل نفسك فى الكلام وخلاص
ولو
فاكر موقف محرج كده عن صاحبك ده مفيش مانع تقوله قدامها يعنى مثلا لو صحبك
ده حاول
قبل كده يتكلم مع بنت وأحرجته قوله يا أخى كل ما أشوفك واقف مع
بنت زى دلوقتى كده
أفتكر البنت اللى قالتلك لم نفسك ياروح أمك طبعا هو
هيبقى واقف بيقول يا أرض إتشقى وأبلعينى
وما شاء الله عليك كده هتبقى
بتحطه فى موقف أرذل من التانى
وهيبقى ربنا يصبره وممكن يدخل الجنة بسبب
عمايلك دى
كل واحد بقى يقولى عايزنى أعمل عن أيه الحصة الجاية

[ندعوك للتسجيل في المنتدى أو التعريف بنفسك لمعاينة هذه الصورة]

الحصة الخامسة
ازاى تبقى رذل مع أخوك
طلع عليه اسمه يستفز وناديله بيه يعنى لو جت ناحيته دبانة مرة بالصدفة كده
سميه دبانة وأستلمه بقى رايح فين يا دبانة جاى منين يا دبانة ياعم أقعد متعملناش فيها دبانة بحق وحقيقى
فكره بالمواقف بتاعت زمان اللى بتضايقه كلها زى علقة حلوة كده من بابا او ماما
هات حاجات ورذل عليه بيها يعنى مثلا لو بيحب الشوكولاته كل ماتدخل البيت هات واحدة فى إيدك وكلها قدامه
ولا أقولك هات علبة وكل ساعة كل واحدة قدامه لحد ما يتحايل عليك تديله منها أو يتغاظ وينزل يجيب
وأنت داخل البيت قوله فى واحد صحبك مستنيك تحت متقولوش هو مين عشان ميعملش ناصح ويتصل بيه يقوله اطلع
قوله هو صحبك وأنا عارف شكله بس معرفش اسمه وخليه ينزل ويطلع على الفاضى
لو انت الكبير قوله انت فاكر نفسك كبرت على الضرب ولا أيه و الكلمة دى رذلة ومستفزة جدا
خليه يحط حاجة كانت فى إيديه زى مثلا قلم ولا موبايله بمجرد ما يحطه خبيه أنت علطول
هيرجع مش هيلاقيه هيتغاظ جدا وهيفضل يقول دانا لسه حاطه هنا بإيدى من شوية
لو نايم استخدم اى طريقة عشان تصحيه من النوم وهما كتار ما شاء الله
عشان اللى معندوش خبرة برضه أقولك تعمل أيه
قيد النور كأنك بتدور داخل تدور على حاجة
وشغل أعلى نغمة فى موبايلك كأن حد بيتصل بيك
ومفيش مانع تدور على الحاجة دى تحت المخدة والمرتبة اللى هو نايم عليهم
مش هوصيك بقى وأنت بترفع المخدة اللى عليها راسه عشان تبص تحتها
لو أنتوا الأتنين نفس نوع الموبايل أقعد ألعب فى البطارية بتاعتك عشان تبقى يادوب هتفضى
وروح غير البطاريات وسيبهاله على شعره يعنى لو حد بس رن عليه ولا هو فكر يشوف الساعة
هيفصل منه شحن وياسلام بقى لو مستنى تليفون ضرورى وفصل منه شحن تبقى مية مية
ولو قالك هات بطاريتك إوعى تفرط فيها صحيح هى بطاريته بس هو هيعرف منين فكك
لو شارى لبس جديد أصحى أنت من الفجر وألبسه وأنزل بيه ولو أتصل بيك قوله أصل أنا صحيت
وملقيتش حاجة ألبسها روحت لبسته بقى وخلاص وبعد كده أبقى اشترى هدوم أحسن من كده
عشان لما أتزنق فى هدوم وأحب أخرج الأقى حاجة كويسة وأقفل فى وشه بالمرة بلاش قرف
مش شرط لبس بس أى حاجة جديدة لازم تحط عليها بصمتك السحرية الأولى قبل مايفرح بيها
أمسح الحاجات اللى على الكمبيوتر اللى هو بيحبها أفلام أغانى صور برامج أى حاجة
قوله أنا كنت مشغل الأنتى فيروس وهو اللى مسحهم شكلهم فيهم فيروس وفيروس رذل كمان إحم إحم
لو واخد ميعاد من حبيبته يكلمها مثلا على الساعة 10 بالليل كده على النت ولا حاجة
أنت قبلها بشوية تقعد تذاكر وتقوم تقول لباباك أو مامتك أنا عايز الكمبيوتر أريح شوية أنا بذاكر من بدرى
خليه هو يروح يذاكر شوية لحد ما أريح ويبقى يجى يقعد وتبقى ضيعت عليه الليلة
جبنا سيرة النت بقى والكلام هيفتح لأ خليها للحلقة الجاية أحسن بقى براحتنا
أو ممكن الحلقة الجاية أكمل الرذالة فى البيت ويبقى بقى على باباك ومامتك
قولولى بقى أيه أكتر حصة مستعجلين عليها فى دول أو أى حاجة تانية وأنا أعمله

[ندعوك للتسجيل في المنتدى أو التعريف بنفسك لمعاينة هذه الصورة]

الحصة السادسة
إزاى تبقى رذل مع حبيبت

كل ماتتفقوا على ميعاد روحلها متأخر وسيبها تتلطع وتتذنب شوية
وأول ماتوصلها متديهاش إهتمام عشان أساسى هى هتطلع فيك عشان اللطعة أنت لاطعهالها دى
فا حاول تتحجج بأى حاجة كأنك بتعمل حاجة فى الموبايل ولما تسألك بتهبب أيه ؟
قولها بستعلم بس عن الرصيد أو أى حجة هبلة يعنى
ظبط كل مشوايرك المهمة على اليوم اللى هتقابلها فيه عشان تدبسها وتخليها تيجى معاك
وياسلام لو كان فيهم مشوار من بتوع المصالح الحكومية اللى بيطلعك وينزلك مية مرة
ويلففك المصلحة كلها حتة حتة يبقى تمام أوى رجلها على رجلك
لما تقولك أنا جالى عريس قولها أيه ده بجد ؟؟؟؟؟
هتقولك أيوة مستغرب كده ليه ؟؟؟
قولها هو فى حد لاقى عرسان اليومين دول على العموم ألف مبروك ياحبيبتى
لو طلعت بتحكيلك عن عيوبه عادى وبتقولك بقى أنا أتجوز واحد بالطريقة دى والكلام ده
قولها ياحبيبتى آمال أنتى فاكرة أحمد زويل هييجى يتقدملك ماهو ده آخرك يعنى
لو العكس بقى وقالتلك العريس عاجب بابا وماما وعنده وعنده وبيقولولى أنتى عبيطة
قولها أنا كمان رأيى من رأيهم , هتقولك رأيك إن أنت كمان موافق عليه ؟
قولها لأ إن أنتى عبيطة
طبعا الغرض الأول من الحوارات دى إن هى تحرك حضرتك عشان تروح تتقدملها
أعمل عبيط بقى ورد على قد اللى بتسمعه وبس
لو كنتوا فى نفس الجامعة بس كل واحد فى كلية وقاعدين سوا
كل ماتشوف واحدة معاك فى الكلية سيب حبيبتك وقوم أتكلم معاها بأى حجة
ولما ترجع قولها كنت بسألها على حاجة مهمة عندنا فى الكلية
ولما تشوف واحدة تانية قوم برضه أعمل نفس الحوار
ولما ترجع قولها أصل الأولى مكنتش عارفة فا سألت دى وهكذا
لو هتدخلوا سينما هى طبعا عايزة تشوف فيلم رومانسى ولا حاجة
أنت بقى أمسك فى إنك تختار فيلم كوميدى أو رعب
لو كوميدى أفضل أضحك طول الفيلم حتى على الحتة البايخة ونفضلها خالص ولا كأنها جنبك
اما لو دخلتوا رعب لو كنت بتحب أفلام الرعب ركز مع الفيلم ونفضلها برضه
أما بقى لو كنت بتخاف وداخلة عند فيها أو عشان تثبتلها إنك بطل وقلبك ميت
فا الحل الوحيد تعمل إنك رايح عليك نومة بس لو معرفتش تنام من صوت الأكشن
فا ألبس نظارة سودة وقولها أصل الأشعة بتتعب عينى وغمض براحتك بقى يامعلم ونفض على الآخر
لو بتتغدوا بره وبتسألها هتاكلى أيه وقالتلك أطلبلى زيك وأطلبلى أى حاجة من غير شطة
وروح وصيه أنت بقى يزود الشطة على قد مايقدر
ولما الأكل يجى قولها أنا كنت فاكرك بتقولى أى حاجة فيها شطة
لو فى مناسبة زى عيد ميلادها أو الفلانتين أو أى حاجة
أتصل بها والأول خدها فى الكلام وأقعد كلمها ساعتين فى حاجات فارغة ملهاش علاقة بالمناسبة
وفجأة قولها ثانية واحدة ياحبيبتى هكلمك تانى فى حاجة مهمة
ومتسألش فيها باقى اليوم وضيع عليها المناسبة
بعد كده لما تسألك السبب قولها أصل كان فى كليب أول مرة أشوفه
أو كنت بتفرج على فيلم عاجبنى وكنت بكلمك فى الفاصل ولما رجع اضطريت أقفل
أو ماما كانت مجهزة الأكل وبتنادى عليا وأنا كنت جعان أوى ومقدرتش أستنى
أى حجة رذلة تحرق الدم وخلاص
لو جابتلك هدية وسألتك أيه رأيك فيها قولها كانت جابتهالى واحدة صحبتى أو قريبتى قبل كده زمان
قصدك يعنى إن الهدية قديمة ومش مالية عينك
ونفس الحوار فى مسجات الموبايل كل ماتبعتلك حاجة قولها اتبعتتلى قبل كده
لو قالتلك مانا بشوف المسجات بتاعتك علطول قولها يبقى شوفتها فى موبايل حد أعرفه
المهم إن أنا قريتها قبل كده حتى لو كنت أول مرة تشوفها فى حياتك
مش بعيد هى بقى تألفلك مسج وتقولها شوفتها قبل كده وتبقى أتفقست يامعلم
عادى برضه شككها فى نفسها وسوق فى الإستهبال
ملحوظة مهمة متخفش مش هتسيبك زى ماقولتلك محدش لاقى عريس اليومين دول
أنا بصراحة ياشباب مش عارف أودى وشى منكم فين على التأخير ده بس ظروف سفر والله
أنا أسف جدا وبعتذر بالأخص للناس اللى سابتلى ردود عشان عايزين الحصة السادسة
وبعتذر أوى أوى لكريستال صحبتى اللى فرجت الناس عليا وكان ناقص تعمل محضر ف

[ندعوك للتسجيل في المنتدى أو التعريف بنفسك لمعاينة هذه الصورة]

الحصة السابعة
إزاى تبقى رذل فى ماتش
دلوقتى أنت قاعد فى كافيه مع أصحابك وبتشوف الماتش إزاى بقى ترذل على الناس اللى موجودة فى المكان
أدخل أقعد أنت وأصحابك وأحجز جنبك كام كرسى وكل اللى ييجى يقعد قوله محجوز
طبعا أنتوا معكوش حد تانى و صاحب الكافيه هييجى يسألك كل شوية افضل إديله أعذار بقى
هما واقفين تحت هما اتصلوا قالوا جايين فى السكة لحد ما يبقى هيولع فيك
قوم أقف كل شوية عشان تدارى على الناس اللى وراك كأنك بتطلع حاجة من جيبك
أو أعمل نفسك بتتكلم فى الموبيل ومتسألش فى حد ويا سلام لو كان معاك علم ولا حاجة
طبعا العلم ده وضيفته التقليدية تشجيع المنتخب
أنت هتستخدمه إستخدام جديد خالص هيبقى وظيفته دلق المشاريب على المتفرجين
والناس اللى هتطلب قهوة وعصير فراولة هتبقى عملت معاك أحلى واجب
كل ما الجارصون يجى يسألك هتشرب أيه قوله كمان شوية
اه قوله متشكر مليش نفس أو خيرك سابق كده يعنى
كأنه عازم حضرتك على العشا ولا من بقية أهلك
حاول تستفز الموجودين وأقعد قول دول أحسن مننا مية مرة دول مقطعينا
دول أكيد هيغلبونا دول عملوا مليون هجمة وإحنا معملناش حاجة
حتى لو كان الماتش لسه فى أوله والكورة متحركتش من نص الملعب
أفتى فى كل كورة وأعملك نفسك ناقد رياضى بس على صوتك شوية
التشكيلة دى غلط المفروض أبو تريكة يلعب ليبرو وعمرو ذكى باك يمين
والمفروض حسن شحاته يطلع عصام الحضرى وينزل إبراهيم سعيد مدافع
ويوقف شادى محمد حارس مرمى
طبعا هتلاقى واحد ولا أتنين مش بعيد الكافيه كله بيقولك لو سمحت خليك فى الماتش أحسن
دول عشان بس غايرين منك متاخدش بالك أنت من الحسد والغيرة دول
دول ولاد الناس الوحشيين اللى بيسموهم أعداء النجاح
أقعد اسأل اللى حواليك كل شوية النتيجة كام كام مع إنك مرزوع فى الكافيه من قبل الماتش بقرن
أو هو إحنا المنتخب اللى لابس لون أيه !! أسئلة غبية على قد ماتقدر بقى
حاول تخنق على الجارصون عشان يغيرلك القناة عشان فى مسلسل أنت متابعه ويغير الماتش
أو حاول تتغابى عليه قوله مثلا
على الصوت عشان مش (شايف)كويس
على فكرة الحركة دى تم تجريبها من قبل وتمت بنجاح
الباشا راح يعلى الصوت وكلنا موتنا من الضحك على غباءه
طبعا كلنا عارفين إن الجمهور عامل قوى ومؤثر
بس بالشكل ده أبقوا قابلونى لو خدنا البطولة ولا شمينا ريحتها

لسه فى كتير استنوا عليه هخليكم موسوعه ادعولى

بسم الله الرحمن الرحيم

لو خارج مع صحبك مشوار
أو بتروحوا حتة معينة كلية أو مدرسة أو أى حاجة
أتصل بيه قوله إوعى تنزل
غير لما أفوت عليك وطبعا هو مش هيشوف وشك
يرن عليك نفض يتصل بيك نفض
سيبه لحد مايطق وينزل لوحده

انا مش شايف انك رزل
امال جبت الرزاله دى منين

موضوع رز......عفوا
جميل زيك

sfwa_sat كتب:: بسم الله الرحمن الرحيم

لو خارج مع صحبك مشوار
أو بتروحوا حتة معينة كلية أو مدرسة أو أى حاجة
أتصل بيه قوله إوعى تنزل
غير لما أفوت عليك وطبعا هو مش هيشوف وشك
يرن عليك نفض يتصل بيك نفض
سيبه لحد مايطق وينزل لوحده

انا مش شايف انك رزل
امال جبت الرزاله دى منين

موضوع رز......عفوا
جميل زيك

ههههههههههههههههههههههههههه

انت شفت حاجه لسه

والله انا مش كده وغلبان اوى

بس فى ناس تستحق الواحد يعمل فيها كده

نورتنى والله ياباشا

الف شكر ليك

هههههههههههههههههه هههههههههههههههههههههه

انت ياباشا مش كده والله انت مش كده جايب الكلام ده منين عرفنى

تسلم ياقمر على البسمه الجميله دى شكرا

منى كتب:: هههههههههههههههههه هههههههههههههههههههههه

انت ياباشا مش كده والله انت مش كده جايب الكلام ده منين عرفنى

تسلم ياقمر على البسمه الجميله دى شكرا

هههههههههههههههه صح بجد انا مش كده بس واحد ضحك عليه وقال اكتبه ههههههههههههههههههه
بس كلام جميل وسلاح جميل الواحد يستخدمه مع بعض الناس اللى تستاهل

Admin عدد المساهمات : 3953 تاريخ التسجيل : 01/07/2009

ههههههههههه
موضوع جميل يانجم
بس انت عارف ممكن يكون رد فعل
اللي انت تعمل فيه كده يكون ايه
علشان كده انصحك ماتحاولش
تعمل بها

senyoureta كتب:: ههههههههههه
موضوع جميل يانجم
بس انت عارف ممكن يكون رد فعل
اللي انت تعمل فيه كده يكون ايه
علشان كده انصحك ماتحاولش
تعمل بها

ايه يعنى انا بخفش ياباشا

وانشاء الله نعمل الكلام ده فى كل حبايبنا

بجد نورتينى ويارب تكونى ضحكتى من قلبك

بجد انا مش كده الكلام ده من وره قلبى شكرا ليكى

نورتينى بجد

الف الف الف شكر ليك موضوع اكثر من رائع تسلم الايادى

شكرا ليك يانجم ردك الجميل تسلم ياباشا شكراا

» دروس إنجليزى للهواه
» حصريا دروس عن الاحتفال بالمولد النبوى لمجموعه من أروع شيوخ الوطن العربي على اكثر من سيرفر
» حصرياً جميع موسوعات واجمل ما القى فضيلة الشيخ محمد حسان ع مدار 20 عاماً - دروس صوتيه بالجوده الاصليه mp3 - تحميل مباشر ع اكتر من سيرفر