منك لله يا ستى

- الله أكبر الله أكبر..أذان الظهر..

- يارب.. يارب بحق ده الآدان تنجح يا نون يابن ابنى وأشوفك دكتور أد الدنيا

- ياستى بس أنا فى تجارة

- وماله يابنى هو يكتر على ربنا...... ده ربنا قادر على كل شئ

- ياستى ونعم بالله بس اللى بيطلع دكتور لازم يكون فى كلية الطب مش التجارة

- ياللا تجارة تجارة ..ومالها التجارة ..دى حتى التجارة شطارة..ده الله يرحمه جدك كان تاجر فى الوكالة أد الدنيا

- ياستى التجارة اللى فى الوكالة حاجة واللى فى الكلية حاجة تانية

- ع العموم شد حيلك أنته وانا أخلى جدك يخدك معاه الوكاله عشان تتدردح وتتودك فى السوق

- جدى إيه اللى هايخدنى معاه .....ده جدى مات من زمان ياستى

- يامصيبتى عبد الواحد مات..ياحبيبى ياأخويا..مكنش يومك ياسبعى

- ياستى ده ميت من تلتين سنة

- تلتين سنه..ده العمر بيجرى ياولاد تصدق ولا حسيت بيهم....ياللا أهو غار فى داهيه....قطع وقطعت سيرته..ده كان بخل الدنيا فيه..أن ما عمره دخل عليه ببطيخة ولاكيس جوافة

- ياستى حرااام عليكى عايز أذاكر بقى

- يوه..وأنا ماسكاك ياوله..ذاكر ...ذاكرعشان ربنا يكرمك وتنجح وتاخد الدبلون

- ياستى دبلون إيه..أسمه البكالوريوس

- أنته عتضحك عليه ياوله..أسمه الدبلون الواد ابن فايزة جدع زيك كده فى مدرسة التجارة وخد الدبلون

- خلاص دبلوم دبلوم ياستى ..سيبينى بقى عشان أذاكر عندى امتحان

- ذاكر ..ذاكر ياأخويا ذاكر... تعرف ياواد ..ندرن عليا يوم ماتنجح لأكون رايحه خاطبالك عبير بنت رئيسه.... دىإيه ياواد .. أدب - وأخلاق .. وعلام كمان

- ياستى عبير دى معاها أعدادية

- وماله يابنى ...الراجل مايعبهوش إلا جيبه

- راجل ... راجل مين ياستى ... عبير دى بنت

- عبير ... عبير مين ياوله .. أنته بتعرف بنات من ورانا

- لا إله إلا الله.... أبوس رجلك ياستى أرحمينى بقه

- طب ذاكر....ذاكر جتك نيله وأنته طالع براوى كده زى أمك....قطعت وقطعت سيرتها...أنامش عارفه أبوك كان أجوزها على إيه..حكم...قال لبس البوصة تبقى عروسة..بس واللى نبى النبى نبى لكون مبوظه الخطوبة دى ومجوزاه أنيسة بت أختى

- ياستى خطوبة إيه.. أبويا مجوز أمى من خمسة وعشرين سنة .. وبعدين أنيسة دى بنت أخوكى مش بنت أختك ..وأساسا إنتى ملكيش إخوات بنات

- صحيح ياوله ..أنته عندك حق أنا مليش إخوات بنات.. أصلى أنا أمى ماكنتش بتخلف صبيان

- حراااااااااااااااااااااااااااااااااام ............ ستى ماتطلعى البلكونة شويه ... ده الهوا حلو بره

- لأ ياخويا .... فى جدع كده حليوه وشعره مسبسب فى البلكونه اللى فى الوش بيقعد يعاكسنى

- خلاص روحى المطبخ ... أهو زمان أمى خلصت الرز

- رز... رزإيه يابنى .... هوأنا ليه سنان للرز ... أناهطلع البلكونه أحسن

- طب أبقى خلى بالك م الهوى ياستى

- هوى لما يلطشك

الحمد لله أخيرا خرجت وقدرت أذاكر .. رحت الأمتحان تانى يوم وربنا كرمني وحليت كويس لكن للأسف المراقب سحب مني الورقة قبل ما أكتب أهم حاجة فيها

ياترى أنا كان إسمى إيه ؟؟ ياترى كان إسمى إيه ؟؟

Admin عدد المساهمات : 3953 تاريخ التسجيل : 01/07/2009

هههههههههههههه جميله يانجم تسلم الايادي فعلا منها لله كل شويه يفكرها لحد مانسيته اسمه تم التثبيت
[ندعوك للتسجيل في المنتدى أو التعريف بنفسك لمعاينة هذه الصورة]

ههههههههههههه الله عليك يابرنس
جميله جدااااااااااااااااا وسته دى مفتريه
وبتفكر فى الواد الحليوه ابو شعر مسبسب
الله يسمحها نسه اسمه

انتو صدقتوا

ده سته اروبة بس هى اللى بستهبل

شكرا ليك يانجم موضوعاتك دائما جميلة وعسولة زيك

ههههههههههههه تسلم ياباشا جميله جدا دام تميزك

ميرسى يا جماعه على الردود الجميلة
اتمنى تكون فعلا عجبتكم

الف الف الف شكر ليك موضوع اكثر من رائع تسلم الايادى