أيام الحرب ........ جامده جدا

أيـــام الحـــرب


وإقعد وإسمع يا ولدي
حكاية من حكايات بلدي
والحكاية مش من بعيد
قريبة من دا العصر
بعد النكسة والضرب
أيام الحرب
وف جيشنا .. كان جدك
والدي
كان راجل عسكري
ضابط وجندي
كنا لسة صغار
بس حاسين بالمرار
فاهمين معنى الهزيمة
عايشينها ليل نهار
نحلم بيوم الإنتصار
حاسينه جاي
مهما طال الإنتظار
ما كان يفرق معانا
مين ضابط مين شاويش
ولا إيه الفرق
بين طعم الكحك جنب العيش
وكان والدي .. جدك
ضابط ف الجيش

ف شارعنا .. كنا معروفين
وكأننا إحنا بس المهزومين
كنت باجري براه
مكسور العين
والقلب حزين
هوايا .. أنين
وأرجع لوالدي .. جدك
أبصله وأناجيه
ترويني نظرة عينيه
برغم مر الهزيمة
جرأة وعزيمة
يصرخ جواه السكات
دي بلادنا عظيمة
ينطق نَفس هوايا
ويقول جوايا .. معايا
لأ .. إبعد يا مرار
راح يجينا الإنتصار
إحنا قوة .. إحنا نار
هانرجّع تاني النهار
والبسمة لقلب الصغار
والراحة للي راحوا
أيام الإنكسار
راح نفوت وراح نعدي
قالها جدك .. قالها والدي
والرصاصة هاتكون ف مقتل
لم ممكن أبداً تطيش
جدك .. كان ضابط ف الجيش

ويفوت اليوم
ووراه ميت يوم
وأنا المهزوم
أنا المكلوم
مستني يوم الخلاص
نفسي أسمع صوت رصاص
تتحقق كلمة
" الحرب ما منها مناص "
وفاتت أيام
عشر أيام م الصيام
وأسمع كلام
الحرب قامت يا همام
بناخد بتارنا
بنرجع ديارنا
هزمنا الهزيمة
عدينا وعبرنا
يا فرحة فطارنا
ولسة كمان
بنعدي ونعبر
يعلا الأدان
الله أكبر
حي على الفلاح
وقيموا الأفراح
م الشرق للغرب
يعود جدك
وقت الفطار
بتراب الحرب
تستقبله الأحضان
ف الشارع الغلبان
وزغرودة طلعت
والضحكة عليت
لبستوهم الطرحة
وأنا ف قلب الشارع
بانط م الفرحة
بكل ما في الفخر
من إحساس
جدك رفعلي الراس
وتعيش يا والدي
يا والدي تعيش
جدك ...
كان ضابط ف الجيش
**************************